ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް) އުފެދުނީ 27 އޮކްޓޯބަރ 2011ގައި ކުރީގެ ރައީސް އަލްއުސްތާޛް މައުމޫން ޢަބްދުލްޤައްޔޫމްގެ މޭސްތިރިކަމުގެ ދަށުންނެވެ. މި ޕާޓީ އުފެދުނުތާ ހަތަރުމަސް ދުވަހުގެ ތެރޭގައިވަނީ ރާއްޖޭގައި ވެރިކަންކުރާ ކޯލިޝަނާ ގުޅުމުގެ ފަޚުރު ޙާސިލްކޮށްފައެވެ. އެގޮތުން ރައީސް ޑރ. މުޙައްމަދު ވަޙީދު ޙަސަންމަނިކުގެ ޒަޢާމަތުގައި (2012-2013) އަށް މިޕާޓީއަކީ ވެރިކަން ކުރާ ކޯލިޝަންގެ އެންމެ ބޮޑު ބައިވެރިޔާއެވެ. 2013ވަނަ އަހަރުގެ ނޮވެމްބަރުމަހު ޕީޕީއެމްގެ ކެންޑިޑޭޓް ރައީސް ޢަބްދުﷲ ޔާމީން ޢަބްދުލް ޤައްޔޫމްވަނީ އެމްޑީޕީގެ ރައީސް އަދި ކުރީގެ ރައީސް މުޙައްމަދު ނަޝީދާ ވާދަކޮށް ރިޔާސީ އިންތިޚާބު ކާމިޔާބު ކުރައްވާފައެވެ. ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގެ 5 އަހަރު ވެގެންދިޔައީ މިހާތަނަށް ރާއްޖެއަށް އެންމެ ބޮޑެތި ބަދަލުތަކެއް ގެނައި، އިޤްތިޞާދީ ގޮތުން ރާއްޖެ ނުދެކޭފަދަ ޒަމާނަކަށް ރާއްޖެ ވާސިލްވި އަދި ރައްޔިތުންނަށް ލާބައާއި މަންފާ ލިބިގެންދިޔަ 5 އަހަރު ކަމުގައެވެ. ރައްޔިތުންގެ މަޖިލީހުގައި މިވަގުތު ޕީޕީއެމްގެ ގޮނޑީގެ ޢަދަދަކީ 6އެކެވެ. ރައްޔިތުންގެ މަޖިލީހުގައި ޕާޓީ ހިންގަވަނީ މައިނޯރިޓީ ލީޑަރ އަޙްމަދު ސަލީމެވެ. މެމްބަރުން ޢަދަދަށް ބަލާއިރު ދެވަނައަށް އެންމެ ބޮޑު ސިޔާސީ ޕާޓީއަކީ މިވަގުތު ޕީޕީއެމްއެވެ. ނަމަވެސް ޕާޓީ އުފެދުނީއްސުރެ ސަޕޯޓަރުން އެންމެ ގިނަ ޕާޓީއަކީ އަދިވެސް ޕީޕީއެމްއެވެ. ޕީޕީއެމްގެ ޙަޔާތުން ހޭދަވި 11 އަހަރުގެ ތެރޭގައި ގިނަ އިންތިޚާބުތަކެއް ކާމިޔާބު ކޮށްފައިވެއެވެ.

ސިޔާސީ ޕާޓީއެއްގެ ގޮތުގައި ޕީއެންސީ ރަޖިސްޓްރީ ވުމާއެކު އެންމެ އިސްކަމެއް ދިނީ 2019 ގެ މަޖިލިސް އިންތިޚާބު ކާމިޔާބު ކުރުމަށެވެ. އެގޮތުން ޕީއެންސީންވަނީ 3 ގޮނޑި ކާމިޔާބުކޮށްފައެވެ. އެ 3 ބޭފުޅުންނަކީވެސް އަލަށް ރައްޔިތުންގެ މަޖިލިސްއަށް ހޮވިވަޑައިގެންނެވި ބޭފުޅުންނެވެ. ޕާޓީގެ ނައިބު ރައީސުންގެ ގޮތުގައި އަލްފާޟިލް މުޙައްމަދު ސަޢީދު، އަލްފާޟިލް މުޙައްމަދު ޙުސެއިން ޝަރީފް، އަލްފާޟިލް އިބްރާހީމް ޝުޖާޢު، އަލްފާޟިލް މުޙައްމަދު ނިމާލް އިންތިޚާބުކުރެވުނެވެ. އަދި އަލްފާޟިލް އާދަމް ޝަރީފް ޢުމަރު ޕާލިމެންޓަރީ ގްރޫޕްގެ ލީޑަރުގެ ގޮތުގައި ކަނޑައެޅުނެވެ.

ޕީޕަލްސް ނެޝަނަލް ކޮންގްރެސް (ޕީ.އެން.ސީ) އަކީ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ތަޞައްވުރާއި ހަމަތަކުގެ ތެރެއިން ހިތްވަރު ލިބިގެން 2019 ވަނަ އަހަރު ވުޖޫދުކުރެވުނު ޕާޓީއެކެވެ. ޕީއެންސީގެ ފައުންޑަރ އަދި ރައީސަކީ ރައްޔިތުންގެ މަޖިލީހުގެ މެމްބަރުކަންވެސް ކުރައްވާފައިވާ އަދި ޕީޕީއެމްގެ ކުރީގެ ނައިބުރައީސް ޢަބްދުއްރަޙީމް ޢަބްދުﷲ އެވެ. ޕީއެންސީ އުފެއްދުމަށްޓަކައި ޕީޕީއެމްގެ ތިއްބެވި އިސް ބޭފުޅުންގެ ތެރެއިން ކުރީގެ އިކޮނިމިކް މިނިސްޓަރ މުޙައްމަދު ސަޢީދު، ކުރީގެ ޑިފެންސް މިނިސްޓަރ އާދަމް ޝަރީފް ޢުމަރު، ކުރީގެ ރައީސުލްޖުމްހޫރިއްޔާގެ އޮފީހުގެ މިނިސްޓަރ މުޙައްމަދު ޙުސެއިން ޝަރީފް، ރައްޔިތުންގެ މަޖިލީހުގެ ކުރީގެ މެޖޯރިޓީ ލީޑަރ އަޙްމަދު ނިހާން ޙުސެއިން މަނިކު، ރައްޔިތުންގެ މަޖިލީހުގެ ކުރީގެ މެމްބަރު އިބްރާހީމް ޝުޖާޢު، ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރ މުޙައްމަދު ނިމާލް މިޕާޓީއާ ގުޅިވަޑައިގެންނެވިއެވެ. ޕީއެންސީ ރަސްމީ ގޮތުން ރަޖިސްޓްރީ ވުމާއެކުވަނީ ޕީޕީއެމްއާއެކު ކޯލިޝަން އެއްބަސްވުމެއް ޤާއިމްކޮށްފައެވެ. އަދި ދެޕާޓީ އެކުގައި މަސައްކަތް ކުރަމުންދަނީ ޕްރޮގްރެސިވް ކޮންގްރެސް ކޯލިޝަންގެ ގޮތުގައެވެ. މެމްބަރުންގެ ޢަދަދަށް ބަލާއިރު ޕީއެންސީއަކީ ރާއްޖޭގައި ހަތަރުވަނައަށް އެންމެ ބޮޑު ސިޔާސީ ޕާޓީއެވެ.